nu al 50 Johr – so schall dat wiedergohn!

…mit Wahlen vun de nee’n Maaten för den Vörstand

Eerstmol hett de ole Vörstand verklort, wat se in de Tied för den Vereen mookt hebbt un dat se verdeent hebbt, dat se wedder wählt werrn. As wi dat kennt, is sone Jahreshauptversammlung nich so kortwielig, un so weeern man ok blots an de sösstich Lüüd in Saal.
So harr Günther Wiegers keen Problem, de Wahlen op siene sinnige Oort dörchtotrecken. Keen een vun de Maaten harr wat to mäkeln, dorüm seeg de niege Vörstand nich veel anners ut as de ole. Blot Christian Wüpper is nee, wieldat Hermann un Luise nich meer dorbi sünd.

Un so süht de niege Vörstand ut:

v.l.n.r.: Christian Wüpper (Utfohrten), Ernst Golsch (Öllermann), Uwe Schröder (Presse), Christa Schröder (Bisitter), Hanni Schulz (Schrieversche), Margrit Rüth (Schatzmeistersche), Dörte Gudat (2. Vörsitter), Helmut Rüth (Maatenverwalten un Websiet)

Achteran harr de Öllermann de scheune Opgav, Maaten to ehr’n, de twintig Johr un länger in Vereen sünd

De Fruunslüüd kreegen een scheune Orchidee un de Mannslüüd ’n Buddel Rotwien.

Achterher kemen bi Je-Ka-Mi de Maaten to Wöör, de snacksche Geschichten vertellt hebben. Dorvun hebbt wi leider keene Biller mokt.
Un – as jümmers – hett Dörte de Lüüd to’n Mitsingen annemeert.

Middeweken, 21. Februar 2024

Lanfhaus Jägerhof, Ehestorfer Heuweg 12-14, 21149 Hamburg

Views: 0

Unse Plattdüütsch-Frünnen hebbt dat ahnt: dat ward full!!!  Al een Stünn ehr dat dat losgüng, weern de mehrsten al dor

160 Stöhl harr Thomas Soltau opstellt – un dat weern noch nich noog. Sandra harr woll de halve Distrikt Süderelv alarmeert.

Denn keem de „Prinzessin in de Wesseljohren“ un broch ehr „Kecke Utsichten“ to Gehör.Dör weer keen düütsches Määrken, wo se nich wusst harr, wat de Wesseljohren mit de scheunen jungen Prinzessinen anstellt: Ob dat de Appelallergie vun Schneewittchen weer, de Hoorutfall vun Rapunzel oder dat trurige Loos vun Rotkäppchen, de ehr Prinz mit de adipöse Fru Holle dorchbrennt is, un, un, un…
To jede Geschicht harr se passliche Leeder prat, de se mit ehr wunnerbore un wannelbore Stimm vördrogen hett. Dat weern bekannte plattdüütsche Leeder (to’n Mitsingen), man ok scheune Chansons un Slager. Mennigmol weer se beter as dat Original!
Die Musik dorto hett de „Mann mit de langen Fingers“Stefan Hiller levert.

Leeve Sandra, dat weer een wunnerscheunen Avend. Nu wüllt wi mol düchtig sporen, dat wi di bald mol wedder inloden köönt.

Middeweken, 17. Januar 2024

Landhaus Jägerhof, Ehestorfer Heuweg 12-14, 21149 Hamburg

 

Views: 0

He hett dat Määrken vun Nutknacker un Muuskeunig op Platt leest. Dorto hett he uns scheune ole Biller wiest, un dat „Ensemble Troika“ hett de wunnebore Musik vun Peter Tschaikowski speelt. Dat weer mol wat ganz anners as wi dat vun unse Klöönsnacks sonst so kennt – aber wunnerscheun.

Dat hebben wull ok de bald hunnertdertig Lüüd in Sool dacht un hebbt düchtig applaudeert. In de Paus geev dat wedder Kaffee un Koken, un – as wi dat kennt – hett dat Team vun Thomas Soltau dat wedder gau henkreegen.

Achteran hebbt de Muskanten rusch’sche Leeder speelt un mit Hölp vun Dörte noch plattdüütsche Wiehnachtsleeder to’n Mitsingen.

As denn Dörte al ehr Afslussleed „In Hamburg sagt man Tschüß“ anstimmt harr, dor geev dat noch een Toggav: De Muskanten hebbt ehr Instrumenten vörstellt un vör jedeen noch een Solo speelt. De över de Maten grote Bassbalalaika hett uns jo all verwunnert, aver as de mit de Treckbüdel jümmers noch een lütteres Instrument speelt hett, weern de Lüüd rein ut de Tüüt.

Dat weer ja wohl dat eerste Mol bi een Klöönsnack vun Plattdüütsch leevt, dat de Tohörers an Enn opstunnen un applaudeerten!

So hebbt wi wedder ’n richtig schöönen Nomiddag beleevt! Hartlichen Dank an Gerd Pillip un dat Ensemble Troika.

Sünndag, 10. Dezember 2023 Klock 15.00
Landhaus Jägerhof, Ehestorfer Heuweg 12-14

Views: 0