Über uns

An 15.02.2017 weern wedder Wahlen för’n Vörstand. De Maaten weern woll mit de Arbeit vun den olen Vörstand tofreden un hebbt se all wedderwählt. Blots de Schatzmeistersche Ruth Schwirblat wull ut gesundheitliche Grünnen nich wiedermoken, is aver Bisitter bleven.
Ne’e Schatzmeister is Margrit Rüth

So süht de komplette Vörstand nu ut:
Ernst Golsch – Öllermann
Hermann Möller – tweete Vörsitter
Hanni Schulz – Schriftföhrersche
Uwe Schröder – Pressearbeit
Margrit Rüth – Schatzmeistersche
Helmut Rüth – Maatenverwalten un Websiet
Dörte Gudat, Luise Möller, Ruth Schwirblat un Christa Schröder – Bisitter

40 Johr “Plattdüütsch leevt”

In de Twüschentied is veel passert: een niegen Vörstand is an 18.02.2015 wählt worrn und dat sünd nu:
Ernst Golsch – Öllermann
Hermann Möller – tweete Vörsitter
Hanni Schulz – Schriftföhrersche
Uwe Schröder – Pressearbeit
Ruth Schwirblat – Schatzmeistersche
Helmut Rüth – Maatenverwalten un Websiet
Dörte Gudat, Luise Möller un Christa Schröder – Bisitter

De regelmäßigen “Klöönsnacks” finnen bi Maaten un Gäst veel Anerkennung.  Dor kommt plattdüütsche Schriever un Snacker to Wöör.  Un dor sünd jümmers so bummelig 100 Tohörers.
De Vereen is stolt op veele interessante Interpreten, de sick freit, bi uns ehr Dööntjes to vertellen oder plattdüütsche Leeder to  singen. Besünners geern hebbt unse Besöker de “Je-Ka-Mi”-Veranstalten, de wi eenmol in’t Johr in Februar mookt. Dor kann jeedeen mitmoken un männicheen nie’et Talent hett de Tohörers mitreten.
Siet een poor Johr mookt de “Kattekers” jümmers in November een  Programm. Dat sünd allens Maaten vun Vörstand.

Op Anregen vun “Plattdüütsch leevt” warrt siet 1980 de Vörlese-Wettstried “Schoolkinners leest platt” dörchföhrt, alle twee Johr un mit Ünnerstützen vun’t Schoolamt. Anreegt hett dat mol Wilhelm Mohr, dorno hett dat Helmut von Eitzen wiedermokt.
De Vörlese-Wettstried schall de Schöler mit dat Plattdüütsche vertroot moken. Wi höpt, dat se dorbiblievt un dat disse Sprok in unse Gegend wieder snackt un verstohn warrt.

To’n Sluss een poor Wöör op Hochdüütsch (dat gifft Soken, de kann een nich översetten):

“Unser Verein hat großen Anteil an der Initiative von niederdeutschen Organisationen und Vereinen zur Europäischen Charta für Regional- und Minderheitensprachen, um das Plattdeutsche nicht als Dialekt, sondern als eigene Sprache anzuerkennen.
Es wurden von uns die Hamburgische Bürgerschaft, die Hamburger Abgeordneten im Bundestag und im Europäischen Parlament angeschrieben mit der Bitte, sich für eine gesetzliche Regelung einzusetzen.
Die Aktion , wie wir sehen, hatte Erfolg.”

Ernst Golsch, Öllermann
Dezember 2015

25 Joahr ,,Plattdüütsch leevt”

Merden in ,t Joahr 1975 seeten eenige heimatverbundene Perseunlichkeiten ut ´n Süderelvruum tosomen un snackten öber Meuglichkeiten to dat Bewohren un de Pleeg von uns plattdüütsche Sprook. Dorbi is rutkomen, den Vereen ,,Plattdüütsch leevt“ to grünnen, Snacker wur domols de Horborger Standesbeamte Heinrich (Hein) Maack un de Heimatforscher und Schrieversmann Wilhelm Mohr ut Francop.

Een Rehg von Gliekgesinnte wöör anschreven un to de Vereensgrünnung inloodt. An ´n 18. November 1975 üm Klock acht Uhr obends wöör in de Gaststee’Willert an ´n Distelacker 3 in Neegroben de Vereen ,,Plattdüütsch leevt – Vereen för Heimat- un Moderspraak” gründt.

Versammlungsleiter wöör Harald Kähler (Vörsitter von de plattdüütsche Theotertrupp ,,De Störtebeker”). Vörsitter wöör Hein Mack als ,,Öllermann”, un Ernst Schmidt, Walter Matthiesen, Magda Schmidt, Herta Schmidt, Wilhelm Mohr un Hilke Stier wörrn dorbi.

An sölbigenobend wöör de Satzung, sowie den Indrag von ´n Vereen in dat Vereensregister beschloten. To glieke Tied schull bi dat Finanzamt för Körperschaften de Gemeennützigkeit von ´n Vereen beandragt warn. (De Gemeennützigkeit is intwüschen bestätigt worrn). No de Satzung von ´n Vereen is de Opgoov, de Leev to de plattdüütsche Sprook to wecken un to fördern oder annere Weg för dat Bestohn von uns plattdüütsche Sprook to finnen un to unnerstützen.

In de Präambel von de Satzung heet dat:

De Vereen ,,Plattdüütsch leevt” wendt sik an alle Börger, de ehre Sprook mehr as een akustisches Verstännigungsmittel is. An dissen Leitsatz von ,, Nedderdüütsch in Hamborg” wüllt wi ankneupen! Wi wüllt verseuken, dat disse Tüüg nich verstummt, sonnern lebennig blivt, denn Plattdüütsch leevt!

In de 25 Joahren von dat Bestohn von ´n Vereen sind över 700 Maaten (Mitglieder) to mellen (z.Z. ca. 300). De Joahrsbidrag bedriggt nur 20,00 Mark.

Besünnert Interesse von Maaten un Gästen findt de regelmässigen ,,Klönschnacks”, bi de plattdüütsche Autoren un Interpreten vördreegt. Regelmässig koomt bit to 100 Maaten. De Vereen kickt stolt op veele interessante Klönschnacks un Sonnerveranstaltungen mit Heidi Kabel, Irmgard Harder; Wilhelm Wieben, Anneliese Braasch, Gerd Spiekermann, Jochen Wiegand trüch. Ober ook veele noch nich ganz so bekannte Schrieverslüüd, Interpreten, Sänger un Schauspee1er hebbt de Tohörers begeistert. Besonners beleevt sünd ook de ,,Je-Ka-Mi-Veranstaltungen”, bi de jedereen mitmooken kann un veele (villicht noch unbekannte) Talente de Tohörers mit Begeisterung animiert hevt.

Op Initiative von ´n den ,,Vereen Plattdüütsch leevt” ward siet 1980 mit Tostimmung un Ünnerstützung von dat Amt för Schoolen in Hamborg de Vörlesewettbewerb “Schoolkinner leest Platt” alle twee Joahr dorchföhrt. Tosomenreekent hebbt bither mehr as 2000 Schoolkinner an dissen Lesewettbewerb mitmookt.

De Vorlesewettbewerb kann un schall Anlass ween, Schöler mit dat Plattdüütsche in Berührung to bringen. To hoopen is, dat de Schöler sik dann wieterhin mit dat Plattdüütsche beschäftigt un de plattdüütsche Spraak von uns Region verstoht un ook spreeken köönt.

Un de Vereen hett grooten Andeel an de Iniative von nedderdüütsche Organisationen un Vereene to de Anmellung no Deel III von de Europäische Charta för Regional un Minnerheitenspraaken. De Hamborger Senot, de Hamborger Börgerschaft, de Hamburger Afgeordneten in Bonn un biet Europa-Parlament wörrn von uns anschreeben un beet, sik för de Anmeldung intosetten. De Akschonen hebbt wiest, dat wi dormit den richtigen Stellenwert anfoot hebbt.

Keen unsen Vereen ünnerstützen oder goor mitmooken will, kann uns kennenlernen. Jeden 3. Middeweeken in ´n Mond dreept wi uns üm Klock 18:00 Uhr in de AWO-Daagsteed in Neegroben/ Neegrobener Markt 7 – dat is achter de Bökerhall. De Intritt to ´n Kennenliern is free.

Günter Nebbe

Dezember 1999, Öllermann