Dat weer ‘n scheunen Nomiddag mit Jan Graf

he hett uns wiest, wo veel Sieden un Saiten he hett

so hett he sien Programm nömt: Dat is nich lustig! – Jan Graf singt un vertellt. 
Un he hett uns wiest, dat “Platt” nich platt sien mutt!

Siene Geschichten vun “Be- oder Entkleidungsvorschriften” in de Sauna, de (villicht) letzten Wöör vun een Radfohrersch, för wat Aliens goot sien kunnt un wat dat mit veganet Hunnenfoder op sik hett – dat weer meist to’n Nodenken, aver ok to’n Smuustern oder to’n Lachen.

In de lange Corona-Paus harr he sik ‘ne Leier baut. Mit de kunn so goot ümgeih’n as mit sien Rietfiedel…

 

…un sien Treckbüdel

De Sool weer wedder mol rappelfull

Keen een hett mäkelt, dat wi kortfristig dat Programm ännert hebbt. Männicheen harr dat gor nich op unser Websiet leest. Man all weern mehr as tofreden un de Öllermann hett sik hartlich bedankt bi Jan Graf. De mutt bald mol wedder komen.

Visits: 0

An 16. März weer Klöönsnack mit Horst Jürgens*

So bummelig hunnert Lüüd weern an Ende tohoop, üm de Geschichten vun em to heuern

…un dorvun harr he ‘n heel’n Barg: vun de Wohrheitslievde vun ein Pastoor, Kokengavel in’n Bett, dat gröttste Rindviech vun de Welt un so wieder. Mit eenmol weer de eerste Stünn üm un wi hebbt dat gornich mitkregen.

Achter de Paus keem he denn mit sien Motto “Löpt sik all’ns trecht, meent Gerda” trüch


un dor hett he uns denn vertellt, wat he so mit Gerda beleevt hett. Männichmol hebbt de Fruunslüüd in Sool sinnig nickoppt, wieldat se dat all’ns normaal funnen. De een oder anner vun de Mannslüüd hebbt keken, as wenn se ok ne “Gerda” tohuus hebben.

An End hebbt wi all tohoop lacht un em heftich applaudeert. De kann geern mol wedderkomen.

*Klock 18.00 in Landhaus Jägerhof*
Ehestorfer Heuweg 12-14
21149 Hamburg

 

Visits: 0

An 16. Februar weer Klöönsnack* mit Grete Hoops

Hanni hett dat so belevt:

Toerst mookt Hermann de Inleitung un snackt över ole Tieden vun den Hoff vun sien Oma un Opa, un wat he dor as lütten Jung belevt hett. Denn stellt he de Interpretin Grete Hoops vör.
Grete Hoops is 87 Johr old un is ut Tarmstedt, Kreis Rotenburg/Wümme.
Se hett vun 2002 bit 2021 all19 Böker schreven. All ehr Geschichten sünd wohrhaftig so oder liek passert, wie se uns verklort hett.
Se vertellt, wie Mimi in`t Theoter geiht un achterno to Huus keen Tähn mehr in Mund hett. Se glövt, dat se  de in`t Theoter verlorn hett un föhrt dor hin, man dor sünd se nich. Annern Dag find Mimi ehr Tähn in`ne Kittelschört wedder.
Denn vertellt Se vun Opa, de mit sien Kumpels de erste Rente versopen hett, un loter Arger mit de Polzei harr, wieldat he noch mit`n Auto no Huus fohrt is.
Jacob un Hanna wull`n een Sülverhochtietsreis an`n Rhein moken. Se wull to keern mool de Lorelei sehn. In een Lokol hebbt de Beiden Zippelkoken un Fedderwitten drunken. Un wat se denn so all`ns beleven dot, dat hett Grete Hoops so wunnerbor vertellt, dat de Tohörers sik bannig högt hebbt.

Dat wär würklich `n vergnögten Avend, wie kunn`n lachen un hebbt uns goot amüseert.”

*Klock 18.00 in Landhaus Jägerhof, Ehestorfer Heuweg 12-14

Visits: 0