An 17. Februar weer de Jahreshauptversammlung…

…mit Wahlen vun de nee’n Maaten för den Vörstand

Eerstmol hett de ole Vörstand verklort, wat se in de Tied för den Vereen mookt hebbt un dat se verdeent hebbt, dat se wedder wählt werrn. As wi dat kennt, is sone Jahreshauptversammlung nich so kortwielig, un so weeern man ok blots an de sösstich Lüüd in Saal.
So harr Günther Wiegers keen Problem, de Wahlen op siene sinnige Oort dörchtotrecken. Keen een vun de Maaten harr wat to mäkeln, dorüm seeg de niege Vörstand nich veel anners ut as de ole. Blot Christian Wüpper is nee, wieldat Hermann un Luise nich meer dorbi sünd.

Un so süht de niege Vörstand ut:


v.l.n.r.: Christian Wüpper (Utfohrten), Ernst Golsch (Öllermann), Uwe Schröder (Presse), Christa Schröder (Bisitter), Hanni Schulz (Schrieversche), Margrit Rüth (Schatzmeistersche), Dörte Gudat (2. Vörsitter), Helmut Rüth (Maatenverwalten un Websiet)

Achteran harr de Öllermann de scheune Opgav, Maaten to ehr’n, de twintig Johr un länger in Vereen sünd

(wenn ji op de Biller klickt, ward se grötter!)


De Fruunslüüd kreegen een scheune Orchidee un de Mannslüüd ‘n Buddel Rotwien.

Achterher kemen bi Je-Ka-Mi de Maaten to Wöör, de snacksche Geschichten vertellt hebben. Dorvun hebbt wi leider keene Biller mokt.
Un – as jümmers – hett Dörte de Lüüd to’n Mitsingen annemeert.

Middeweken, 21. Februar 2024

Lanfhaus Jägerhof, Ehestorfer Heuweg 12-14, 21149 Hamburg

Visits: 0

An 17. Januar weer Klöönsnack mit Sandra Keck

Unse Plattdüütsch-Frünnen hebbt dat ahnt: dat ward full!!!  Al een Stünn ehr dat dat losgüng, weern de mehrsten al dor

160 Stöhl harr Thomas Soltau opstellt – un dat weern noch nich noog. Sandra harr woll de halve Distrikt Süderelv alarmeert.

Denn keem de “Prinzessin in de Wesseljohren” un broch ehr “Kecke Utsichten” to Gehör.Dör weer keen düütsches Määrken, wo se nich wusst harr, wat de Wesseljohren mit de scheunen jungen Prinzessinen anstellt: Ob dat de Appelallergie vun Schneewittchen weer, de Hoorutfall vun Rapunzel oder dat trurige Loos vun Rotkäppchen, de ehr Prinz mit de adipöse Fru Holle dorchbrennt is, un, un, un…
To jede Geschicht harr se passliche Leeder prat, de se mit ehr wunnerbore un wannelbore Stimm vördrogen hett. Dat weern bekannte plattdüütsche Leeder (to’n Mitsingen), man ok scheune Chansons un Slager. Mennigmol weer se beter as dat Original!
Die Musik dorto hett de “Mann mit de langen Fingers”Stefan Hiller levert.

De is alleen ‘n ganzes Orchester an sien Keyboard. Chapeau!
As Dörte denn mit “Hölp” vun de twee ehr Afsluss-Leed sung, weer de Avend veel to gau vörbi.

Leeve Sandra, dat weer een wunnerscheunen Avend. Nu wüllt wi mol düchtig sporen, dat wi di bald mol wedder inloden köönt.

Middeweken, 17. Januar 2024

Landhaus Jägerhof, Ehestorfer Heuweg 12-14, 21149 Hamburg

 

Visits: 0